Un palaciu
Por ser educáu pa príncipe, yo tamién tuve l’aquel –el privilexu- d’estudiar nun palaciu barrocu que fuera enantes castiellu medieval, cola más grande parte de les aules en torno a un patiu de galería corrida que descansaba sobre doce columnes toscanes y que tenía l’orixen nun torreón del sieglu XII d’aules redondes, enllenes de lluz pola orientación sur oeste y una por pisu. Un palaciu cerráu por una muria a la vera d’un regueru y árboles xigantes custodiando’l pasu d’un camín que da nome al llugar y que siguen utilizando los vecinos del barriu y los pelegrinos que vienen rendir cuentes al Salvador dende Santiagu.
Un palaciu convertíu n’institutu con pistes de hockey, balonmano y baloncesto, campu de fútbol, fosu de saltu, una pradería pa tirase y nun facer nada y un ampliu paséu dende’l portalón de fierro de la entrada que valía nos recreos pa sentase a charrar, dacuando pa cortexar y más bien pa ver. Y nel interior una biblioteca enllena de llibros necesarios y otros vedaos que nun s’afayaben en nenguna otra parte –ellí lleí con 15 años “La conquista del pan” de Kropotkin-, unes alacenes atacaes de cerámica tradicional, una amplia pinacoteca que visitábemos con cada nuevu cuadru qu’aportaba a la collección y un salón d’actos nel que sentimos a un premiu Nobel enantes de que-y lu dieran, a bien de premios Príncipe d’Asturies que tovía nun lo yeren, a un cantante que depués vendió millones de discos y a abondos autores teatrales que nos cambiaron la visión del mundu coles sos obres. Un palaciu nel que ficieron porque estudiara más de lo que lo fice y al que depués acabaron diendo los mios fíos por naguar compartir con ellos esi privilexu que yera pasear per onde paseara Xovellanos, durmieran les tropes franceses camín de sofocar el llevantamientu d’Uviéu, sirviera de campu d’entrenu pa los revolucionarios d’ochobre y los fieles a la República y contemplara al delláu como surdíen tolos plantes mineros del tiempu y como cayó la mina nel pozu del olvidu.
Un palaciu institutu públicu al que llegar en bici, como lo fai agora mesmo al d’ella la princesa Amalia d’Orange, futura reina d’Holanda, y ensin más privilexos que’l propiu de ser un privilexu estudiar nél y que nun taba nin en Gales –qu’agora tá tan de moda- nin en Canadá –que yá lo tuviera- sinon en Mieres del Camín, nel barriu de La Villa, a la vera del regueru Duró y del Camín Real de Castilla, onde Teodoro Cuesta dexó escrito “Soi d’esta villa y a honra tengo haber nacío nella”.
