Agora mesmo
Dacuando veo muertos -como-y diz Haley Joel Osment, nel papel de Cole Sear, a Malcom Crowe, qu’interpreta Bruce Willis, na película “El sexto sentido” del realizador indiu M. Night Shylmalan-, y esta mañana de fin de branu vien de pasame una vuelta más de la que tomaba un café cola mio fía Sara na terraza del Yaracuy, en Mieres. Podría xurar que na mesa d’al llau -yo púnxeme de llombu porque nun yera quién a creelo y diome un aquel recordalo- sentaba Amelia, una conocida de la qu’escribiera dalgo a finales de los ochenta recordando como a primeros d’aquella década’l mundu parecía tar cambiando a bálagos y pa ella nun había suficientes Dry Martini nes nueches d’Il Gattopardo que diseñara más d’una docena d’años enantes Chus Quirós. Y agora’l mundu cambiara o taba cambiando porque lo que sonaba pelos altavoces yera “One love” (“let’s get together to fight this holy armageddon” y vamos tar xuntos y sentinos bien, que rezaba en público Bob Marley) y enforma más fuerte “Runaway” (“was a little runaway” la fía de papa aprendiera aína toes eses coses que nun yera quién a contar, que cantaba un mocísimu Jon Bon Jovi) y Amelia baillaba como poseída pola pantasma del tiempu perdíu con una copa nes manes que dexara de ser l’intelectual Dry Martini p’arrecender al coñac del Lumumba o al vodka del Destornillador, compuestes qu’agora mesmo yá nun remembren nin siquiera los camareros con menos de cincuenta años.
Y Amelia, a la que llevaba más de trenta años sabiéndola muerta y xuraría fuera al entierru d’ella, sienta al delláu na terraza del Yaracuy con un grupu d’amigues de la quinta que ronda los setenta y cinco y siéntoles falar de cuando sentíen “Abraxas” de Santana como poseses, yeren quién a llevar les faldes más curties y les botes más altes, aparcaben el Mini Cooper delantre del Capri, fumaben pitu tres de pitu, bebíen coses que se pronunciaben n’inglés o en francés y regresaben a casa ente les tres, les cuatro o les cinco la mañana pa llevantar al día siguiente y dir como pinceles a clase a primera hora a la Universidá o al trabayu la que yá trabayaba. Y de la que pago y vuelvo mirar pa elles, y p’Amelia en particular, siento na cabeza a Kris Kristofferson cantando “I’d trade all my tomorrows for one single yesterday” (cambiaría tolos mios mañanes por un simple ayeri) y monto en coche y dexo que suene C. Tangana y Rosalía, “Antes de morirme”, que nun fala del ayeri nin del mañana sinon del agora mesmo.
