Alegría
De la qu’aportó San Marcos a Alexandría a predicar l’Evanxeliu rompiera contra una roca la sandalia nel desembarcu y, con too, dio gracies a Dios de les bondaes del viaxe. Esto fue lo que m’aprendieron en casa, a sentir como un bien l’alegría mesmo de vivir, mesmo de viaxar, mesmo de dalgo tan flexe como romper una sandalia que nun ye nada. Ye’l meyor exemplu qu’alcuentru pa falar nestos tiempos enllenos d’augures y agoreros que perdieron esa alegría de lo cenciello.
Asina, a Xulio César nengún auguriu fue quién apartalu de nenguna empresa. Y ello fue que, navegando la Mauritania, espanguó al desembarcar interpretando’l mal agüeru como bonu: “África, yá te tengo”, que dixera enantes de conquistala. D’otramiente, Calpurnia, la muyer, na nueche cabera que’l pasó na tierra viólu xacer nos sos brazos atacáu de bien de feríes. Rogó-y que nun fuera al día siguiente al Senáu; pero él nun la obedeció, pa que nun pareciera que dacuando lu arredrara un mal agüeru. Nel tiempu de la cayida de Marsella d’él fuera la orden de mandar tayar el bosque sagráu de los dioses galos demostrando asina que nun creyía en superstición dala. “Tolos presaxos tienen poder en proporción a la credulidá de los que los acepten”, que dixera John of Salisbury.
Enfrento’l nuevu añu cola sensación estraña de la lluvia na cara que tanto me presta cuando me garra en monte, cola alegría descomanada del mio fíu Abel cuando marcó l’últimu gol de la tanda penaltis y yo tenía los güeyos tan atacaos de llárimes que nun fui quién a disparar un foto qu’inmortalizara l’actu, cola sonrisa de Xulio César que ye a tayar aquel bosque sagráu de los galos y saber que nada van poder esos dioses que nun son nada nin fuera de la Galia nin na Galia mesma en nada tiempu. Enfrento l’añu nuevu col biecu na cara del imbécil, del guaje que sabe que les coses nun son asina pero asina les quier. Enfrento l’añu riéndome a la cara una vuelta más de les coses de les que siempre me reí y me rieron, de la lluvia na cara, de los goles de penalti, de los bosques sagraos y de la Galia entera, y de les coses que me duelen y que ya cansé de que me duelan: esta ye la maravía de los propósitos del nuevu añu, que da igual que se cumplan que nun se cumplan, lo que presta ye poder col tiempu reíse d’ellos. Tiempu, namás que tiempu, pa l’alegría.
