Covid
Alcordéme estos díes de descansu d’una hestoria del llexislador Zaleuco de Locris que nel sieglu VII enantes de Cristu pasó por ser ún de los xueces más honestos del so tiempu. Y ello fue qu’a un fíu d’él acusánralu d’un delitu de desórdenes públicos por ebriedá y males compañías y la pena, según la llexislación de la dómina y del llugar, yera la perda de los dos güeyos. Con too y que’l delitu fuera probáu y que la pena yera la xusta, el pueblu pidió-y a Zaleuco que, como xuez, lu perdonara. A lo que contestó: “Yá que me lo pidís voi perdonar a medies al mio fíu, por nun ser l’únicu culpable, y voi mandar que-y saquen namás un güeyu. L’otru voi sacámelu yo, yá que siendo’l padre tendría d’habelu educao enforma meyor. Y d’esta manera voi dar cumplimientu exactu a la llei, yá qu’ésta nada diz sobre qué güeyos se tienen de sacar”.
Y yá m’alcordara de Zaleuco de Locris va unes selmanes de la que fueron noticia aquellos rapazos a los que’l gobiernu balear trancara nun hotel pa evitar contaxos del covid. Lo ablucante de la noticia yeran los comentarios de los padres sobre l’encierru de los fíos y les manifestaciones d’estos gritando llibertá dende les terraces del hotel. Pasó, entós, de ser interesante la noticia de los fíos pa pasar a selo los comentarios d’aquellos padres. Más que nada porque-yos tocó, porque de nun toca-yos formaríen parte de los miembros de la so xeneración a los que siento despotricar tol día delante de les imáxenes de televisión qu’arranquen con botellones de playa y terminen con fiestes clandestines en locales habilitaos a la trágala pa faceles. La mesma xeneración que -teniendo en cuenta qu’escribo dende Mieres- nun perdió fiesta nin ganes de siguila hasta les tantes y que continúen falando d’elles como’l meyor de los tiempos vivíos. Y nun se trata namás d’esa xeneración qu’agora tien fíos del tiempu de facer lo qu’ellos ficieran, que también podría falar de la mía que tampoco dexaron de facer lo mesmo nel so tiempu y de la siguiente a les nuestres que tovía ta preparando a los guajes pa les fiestes de la década viniente.
Y nun pueo dexar de pensar en Zaleuco de Locris porque, el final, viendo lo que llexislen los nuestros llexisladores y sintiendo lo que deciden los nuestros xueces, nun pienso más que, al final, lo que falla ye la xusticia. Los padres ficimos lo que los nuestros padres ficieron. Y los nuestros fíos aprendiéronlo bien.
